تولیدی لباس کار تبلیغاتی تهران09125234902

چیلله گئجه‌سی آنامین یانیندا اوتورموشدوم کولک قاپ من باجانی بئله دؤیوردو سانکی الی قیلینج‌لی‌دان قاچیر.
آتام قارپیز کسیردی منیم پاییمی قویدو بوشقابا وئردی، آما گؤزوم قالمیشدی نارلاردا، گؤزله‌ییردیم نار یئیک، ایچیمده دوشوندوم نار دان سؤز سالسام بیلرلرنار ایسته‌ییرم او اوزدن آناما دئدیم آی آنا ندن بو مئیوه‌نین باشیندا تاج وار؟ آنام بیر نارا باخدی بیر منه، قیرمیزی نار گؤتوروب بوشقابدا وئردی سن بونو یئمک‌ده اول منده نارین ناغیلین دانیشیم.
ایل‌لر اؤنجه بیر شاه اوغلو واریمیش آدی باریش، چوخ گؤزل هابئله چوخ مهریبان، بتر ده گوجلویموش، آت بئلینده اوتوراندا توزونا چاتان اولمازدی، اوزون سؤزون قیسساسی اون اوغلو اولان دا آرزیلایاردی بو اوغلان دا منیم اولسون.
گونله‌رین بیرینده باریش یار یولداشی‌لا چیخار اووا، نئچه داغ دره چؤل دولانارلار، سانکی اوو پایلاری یوخویموش هئچ نه تاپمازلار،بیر دووشان بئله قارشیلارینا چیخماز. تورانلیق کؤچموشدو چادیر قوروب اود قالاییب گئجه‌نی باییردا قالارلار.
سحرین قاش آغرانیندا باریش یولداش‌لاریندان اؤنجه آییلار، گؤرر چادیرین یانینداکی بولاقدان قریبه سو شاققیلتیسی گلیر، یولداشلاری آییلماسین دئیه إحمالجاسینا چیخار إشیگه آمان ایلاهی بو نه گؤزل‌لیک، ملک کیمی قیز اوتورموشدو سویون ایچینده بولاغین سویو آخدیغی بویدا ساچلارین داراییردی، قیزجیغاز قورخماسین دئیه سس‌سیز سمیرسیز سو سایاق آخدی بولاغین یانینا قیز قفیلدن باشین چئویرنده باریشی گؤردو، باریش دیلی توتار توتماز دئدی سلام قیز دئدی سنی آند وئریرم سؤکولن دانا منی گؤرمزدن گل، باریش دئیه‌ر آی خانیم سیز کیم‌سیز؟ هارالی‌سیز؟ بیر آددیم داها گؤتورر و آیاقلاری سویا چاتار، قیز دئیر بو بولاغین سویو آزالیب سو تانریسی منی گؤندردی بونا یاردیم اولام، منیم ساچیم اوزاندیقجا سو آرتاجاق، او اوزدن بوردا ساچیمی سویون آخلیمینا داراییرام، داها ایره‌لی گلمه. باریش دئیر آی خانیم من سیزه وورغون اولدوم قیز دئیر سن آدام سان من‌ایسه تانریجا بو نئجه اولار؟ اوسته‌لیک گونش گلدیگینده من گرک اوچام، بوشلا بو سؤزلری. باریشین ایکی الی اولار بیر باشی!
تانریجا قیز گؤرر اوغلان چوخ ناراحات دی دئیر بو گؤروشون سئررین آچماسان هر گئجه‌ سنین یوخونا گله‌رم باریش دئیَر یوخو بس اولماز کی بیرده نئجه اینانیم بلکه گلمه‌دین؟
قیز دئیر یالانیم اولسا هر اولدوز جانیما بیر آغی‌لی اوخ اولسون، اینان گلرم. گونشین ایلک شافاغی توشنده تانریجا بیر گؤز قیرپیمیندا یوخ اولار.
باریش قولو قانادی سینمیش قوش سایاغی قاییدار چادیرا ساری، یار یار یولداش قوللوق‌چولاری دورموشدولار سحر یئمه‌یی حاضیرلاییردیلار باریشی پؤزغون دارغین گؤرجک نیگران اولوب دئدیلر خئییر اولار سولطانیم ندیر سنی بو حالا سالان؟ باریش دریندن بیر آه چکیب کئچر چادیرا یولداشلارینا دئیَر یئمک بیتدیگینده قاییداق اؤز یوردوموزا. امیر سنین دیر شاه‌اوغلو دئییب آز سونرا آت‌لار حاضیر دؤنرلر یوردلارینا، شاه اوغلونو گؤرجک نیگران اولار کی ندن تئز قاییتدیلار؟ بس نییه اوولاری یوخ؟ باریش آتاسینین قوللوغونا گئدیب و دئیَر آتا جان بیرآز کئفیم یوخ او اوزدن قاییتدیق ایجازه وئررسیز سونرا چیخاریق، آخشام اولدوغوندا باریش تلیم‌تله‌سیک شام یئییب یاتاغینا گئدر، گؤزلرین یومودوغو آن تانریجانی گؤرر، الیندن یاپیشار خوش خوش دانیشا دانیشا داغ‌دان دوزه یئنر دره دن داغا چیخار هئچ بیلمز نه زامان کئچدی کی خوروزون سسی یوخویا سون قویار، نئچه واخت بئله‌سی کئچر، باریش کئفسیز اولار یوردون حکیمی گلر باریشی گؤرسون بیلر کی آچیلماز سئوگی ماجراسی وار کؤکسونده و دوزلمه‌سی ده بو سیرری آچماغا باغلی دیر هر نه دانیشار باریشی گؤیولا گتیره بیلمز آخی باریش بیلیردی کی دانیشسا داها یوخو مومکون اولمایاجاق.
حکیم الیندن بیر ایش گلمه‌دیگینه گؤره ناراحات اولوب قاییدار، صاباحی‌سی گون هر نه گؤزله‌یرلر باریش‌دان خبر اولماز، اوتاغینا کئچیب گؤررلر یوخودا دونیاسین دییشیب!
چوخ آغیر نیسگیل‌له تورپاغا تاپشیرارلار، ایل باشا چاتاندا باریشین تورپاغیندا قریبه آغاج بیتمیشدی چوخ گؤزل تومورجوق آچمیشدی هامی دئییردی گؤرن بو نه آغاجی دیر نه بار وئره‌جک؟ یومورو باری واریدی اوسته‌لیک اوستونده بیر تاج! شاختا دوشدوگونده یومورو بار پارالاندی و نئچه داملا قان کیمی سو آخدی.
اوبا دا توی واریمیش گلینین یولو دا باریشین مزاری طرفیندن، گلین اوردان کئچنده نارین بیری بوداق دان قوپار دیغیرلانار گلینه ساری، گلین ناری سئوگی سونومو بیلیب اؤزویله آپارار، دئیرلر اؤنجه هئچ نار یوخوموش ایلک نار آغاجی بئله‌سی یاراندی